LA ESPERANZA Marta Mori Alexei Sobre’l papel, el nome d’un desconocíu. Na esquina, prendida con un clip, la to sonrisa de neñu. La to sonrisa, Alexei, vieno hasta equí altravesando sombres, desafiando les lleis inciertes del destín. Les tos pisaes sobre la nieve sucio apunten a otres tierres. Y mientres, nes camperes d’árboles desnudos, unos páxaros llevanten el vuelu. Álex Llegasti cola sonrisa puesta, colos güeyos azules y perfechos, cola inocencia escondida y rellumante de los neños que yá vivieron muncho. Enteru y verdaderu. Ensiguida te ficisti l’amu’l mundu: los páxaros cantaben pa que tu los oyeres y los árboles echaben fueya namás pa tu t’abellugar. Y nosotros, que nunca enantes nun pensáremos en vivir otres vides distintes de la nuestra o en firmar con otru nome, atopámonos de repente fuera de la nuestra piel, andando los tos pasos, llorando les tos llárimes, falando nuna llingua estranxera. Los nomes I Fíu míu, tu yes el fíu del mio sangre. Los tos pies, que poco más sabíen que’l tocar sin pesu de la nieve andaron y andaron al tresvel de la hestoria pa llegar hasta equí. Los tos güeyos, qu’apenes teníen visto otra cosa que’l pasu de la lluz detrás de los cristales, miraron pa esta tierra y ensiguida conocieron nella la so traza de tierra. Y los tos llabios, que cuasi nun teníen dicho más nada que l’apellíu ásperu del pan cotidianu, punxéron-y a esta casa el so nome de casa. II Tu nada sabíes del llinaxe sin duelu de los homes. Nada que nun fuere el miagar desesperáu de la gata que llanza nel teyáu el so brinde d’amor. Por eso, namás veme, -a mi, que me desangro inútilmente un mes y otru- corristi a bautizame col to sangre, escribiéndome na frente el mio nome de muyer. La fía del padre Soi muyer y tengo un cuerpu distintu al tuyu. Tengo manes pa trabayar y afalagar al mio amante, pechos suaves y un espaciu ente los dos cadriles ú cabe’l mundu enteru. Sé dicir pallabres que curen o qu’enguicen los ánimos. Les mios llárimes son iguales a les llárimes de toles muyeres que conocí. Soi muyer y la mio mente ye clara y vibrante, como la tuya. Tengo güeyos pa ver lo que tu nun yes a ver y la mio risa acompaña a la tuya dende siempre. Porque yo, la fía del padre, hubi de facer un llargu viaxe enantes de tornar pa dicite namás eso, que soi una muyer. El tiempu de la espera Acabóse’l tiempu de la sema. Lloñe queden Nueva York, les altes torres del deséu, les murueques de suañu del Coliséu, enceses de branu y de povisa, los desiertos de sal, los afanes y los encamientos. Pasó’l vértigu, pasaron les promeses. Agora ye otru tiempu nuevu: ye’l tiempu del lleldu y de la espera. Tiempu pa posar la mirada nos riegos escucando los biltos. Tiempu d’arroxar, de sentar cabu’l fueu a ver cocer el pan. Ye un tiempu pa la escucha y l’escaezu. Pero agora, igual qu’entós, el mundu termina nos tos güeyos. MARTA MORI nació en Xixón (Asturies, España) en 1965. Doctora en Filología Española, da clases en un Instituto de Secundaria y en la Universidad de Oviedo. Ha realizado diversas investigaciones literarias y didácticas. Asimismo, ha escrito dos poemarios, Pórticu y El tiempu de la espera (en prensa) ambos Premio Teodoro Cuesta de poesía. En el 2003, adoptó junto con su esposo un niño ucraniano. Recientemente, ha sido nombrada académica correspondiente de la Academia de la Llingua Asturiana. LATINO ARTISTS ROUND TABLE